Цаг хугацааг уртасгагч богиносгогч
Тантай байх яагаад ийм шидтэй юм бэ
Тавилан байдаг бол
Тэвэрт тань сэрэх өдөр хурдан ирээсэй

ххх

Огтолцохгүй зэрэгцэх бурхны зураг
Нартай бороотой алинд ч
Тантай өдөр гэрэлтэй
Бусдаас нуугдан хоюул
Хөтлөлцөн алхая үүлэн дээр

Торон даашинзаа өмсөөд

Толинд харлаа

Танихгүй гуниг нүүрэнд нь тодорсон 

Төрсөн өдрөөсөө зугатаахаар завдах 

.... тэвдсэн бүсгүй

Тэвэртээ тасарч унаж буй сувдан зүүлтээ нааж

Удаан, удаан зогсоод л 

Явахгүй гэж шийдээд 

Яаран бүгдийг нь тайлав 

Бүгдийн өмнө ирдэг 

Буцах замгүй өдрүүд 

Будгаа арилгаад 

Хөнжилдөө шургав

Үнсэх дуртай тэр хацар

Үнэрлэх дуртай хүзүү 

Үнсүүлэх дуртай чих минь

Үлдээхгүй амтлах миний уруул ...

Урд насандаа бид угаас л ийм байсан 

Тэр намайг тэвэрч 

Тэвэрт нь би нялхран эрхэлж 

Хөтлөлцөн алхаад л хөхрөлдөн гүйж байсан

Шаргал намрын жихүүн өдөр 

Шаржигнах навч модод ... 

биднээс өөр хэн ч үгүй 

Үүлнээс дээгүүр нисэж 

Үг хэлэхгүй ойлголцож 

Эвлүүлж тавьсан оньс адил 

Эвээ олоод эвхрэлдэнэ 

Хувь заяа биднийг уулзуулах л гэж 

Хуурай дарсны бөглөө өөрөө онгойж асгарсан

Хуучин шүлгээ дахин унших мэт 

Хачин танил мэдрэмжээр би дүүрнэ 

2015.04.07